KORONADAL CITY- Nagbubo ang luha kag emosyon sa lubong ni Private First Class Mark Daryll Parba sang Koronadal City, isa sa mga baganihan nga nagbuwis sang kabuhi para sa kahilwayan sang Marawi City batuk sa pagpanakop sang ISIS-MAUTE.
Nahibaluan nga gindul-ong na sa ulihi nga palahuwayan ang 22-anyos nga suldado nga napatay makaligad nga maigo sang shrapnel sang RPG sa kasagsagan sang inaway sa Marawi kun diin napuno sang emosyon ang ginpatigayon nga lubong nga gintambungan sang mga malapit nga mga abyan, militar kag pamilya sini.
Wala man malikawan sang mga katapu sang 27th Infantry Batallion sa pagpanguna ni 2nd Lt. Ranjan Palacio nga mangin emosyonal kun diin ginkilala sang mga ini ang ginhimo nga kabaganihan ni PFC Parba nga ginsakripisyo ang kabuhi apisar may bata kag pamilya nga nagalaum sa iya.
Kaangot sini, ginpahayag sang 27th IB nga ang kamatayon sang pila nila ka mga kaupdanan ang indi magapauntata sa ila agud nga ipakigbato ang pungsod kag mga Pilipino.
Kaangot sini, nabaton naman sang pamilya Parba nga napatay ang ila nga bata bangud sa paghigugma sa pungsod kag sa ginsumpaan sini nga responsibilidad.
