KORONADAL CITY-Ginsuguran na sang Land Transportation Office ukon LTO 12 ang inspection sa mga terminal sang bus kag van sa bug-os nga rehiyon bilang preparasyon sa undas 2017.
Sa interbyu sang Bombo Radyo Koronadal kay LTO 12 Regional Director Macario Gonzaga, ginpahayag sini nga ini ang kabahin lamang sang “oplan biyaheng ayos, Undas 2017” nga may tinutuyo nga makaangkon sang mga public assistance sa mga byahero nga ginalauman nga magdagsa umpisa subong nga adlaw.
Samtang ginmando man sang Department of Transportation nga mag inspection kun may mga permiso ukon papeles ang mga nagabiyahe agud masiguro nga mangin maayo ang tanan.
Sa subong, amat amat na nga nagadagsa ang mga biyahero sa mga terminal sa South Cotabato kag nagdugang na subong nga adlaw ang mga bus companies sang ila mga unit bangud sa ginalauman nga pagdagsa sang mga pasahero.
