KORONADAL CITY – Ginatan-aw sang Integrated Provincial Health Office sang South Cotabato nga rason sang liwat nga pagpanumbalik sang balatian nga polio sa Pilipinas amo ang pagnubo sang immunization rate.
Sa esklusibo nga interbyu sang Bombo Radyo Koronadal kay IPHO Chief Dr Rogelio Aturdido Jr, ginpahayag sini nga dako nga rason sa pagbalik sang polio makaligad ang 19 ka tuig amo ang pagnubo sang numero sang mga ginikanan nga nagapakuna sang ila nga kabataan batuk sa polio sa nakaligad nga mga tinuig.
Suno kay Aturdido, yara lang sa 75% ang napagkit nga nagpakuna sa halos 26,000 ka target nga mga kabataan nga dapat nga pabakunahan batuk sa nagkalain-lain nga balatian lakip na ang polio sa South Cotabato sang nakaligad nga tuig 2018.
Mas manubo ini sa 95% nga health immunity agud nga maprotehiran kag mapunggan ang paglapta sang virus.
Samtang, magluwas sini posible man nga rason sang pagbalik sang polio amo ang kahadlok sang mga ginikanan bangud sa mga napagkit nga kaso bangud sang Dengvaxia Vaccine..// Sa karon, hugot nga ginatutukan sang ahensya ang kada barangay sa probinsya agud nga masiguro nga indi makasulod ang polio virus sa South Cotabato.
Kaangot sini gina-awhag ni Aturdido ang mga ginikanan nga indi magkahadlok sa pagpakuna batuk sa polio bangud ini ang pinaka-epektibo nga tikang agud nga malikawan ang nasambit nga balatian.
Suno kay Aturdido, wala sang dapat nga kabalak-an ang publiko bangud sa pagligad sang tini-on napamatud-an na nga luwas kag epektibo ang polio vaccine agud nga malikawan ang paglapta sini.
Dapat suno nga pabakunahan sang mga ginikanan ang mga kabataan nga nagapang-edaron sang 5 ka tuig panubo agud ang mga ini sa mga sintomas sang polio.
Samtang, ginpa-athag man sini nga sa kasamtangan luwas ang SoCot batuk sa polio apang wala naman sila nagapakampante.
Kaangot sini, ginpakig-angotan na sang IPHO ang mga barangay workers sa kada banwa nga pagpalapnag sang polio awareness kag pagpromotir sang proper sanitation practices bilang mabaskig nga estratihiya agud nga pakigbatuan ang polio.
Ipabilin suno pa nga limpyo ang tubig nga gina-inom kag sekyaron nga nahugasan ang kamot antes ang pagkaon.
