Patay ang isa ka 77-anyos nga lolo matapos makuryente sa iya nga talamnan sa Purok Mahidaeton, Barangay Libas, Tantangan, South Cotabato.
Ginkilala ang biktima nga sa alyas nga “Rodolfo”, biyudo, kag residente sang nasambit nga lugar.
Base sa imbestigasyon sang Tantangan Municipal Police Station, pasado 8:30 sang gabi nakadawat sila sang tawag angot sa insidente nag pagkakuryente.
Nagalin suno pa ang biktima pakadto sa iya nga talamnan, apang nagtingala ang pamilya sini nga wala na ini nakapauli sang udto agud magkaon tubtob naghapon na.
Bangod sini ginpangita na ini sang iya nga apo kag nasapwan nga wala na sang kabuhi sa tunga sang talamnan.
Suno sa kapulisan, posible samtang nagalakat ang biktima aksidente sini na kaptan ang linya sang kuryente nga nagtuga sang iya kamatayon.
Gilayon man gidala ang patay nga lawas sang biktima sa isa ka punerarya sa banwa sang Tantangan agud ipaidalom sa postmortem examination.
