KORONADAL CITY – Naghatag na sang bulig ang Local Government sang Buluan matapos ang masubo nga trahedya nga nagluntad sa Buluan lake kung sa diin nadulaan sang kabuhi ang isa ka 40-anyos nga iloy matapos malumos bangud sa pag baliskad sang ila gina sakyan nga bangka sa madalom nga bahin sang Buluan Lake sa banwa sang Buluan, Maguindanao del Sur, kahapon nga adlaw sang Lunes, Nobyembre 3, 2025.
Ginkilala ang biktima nga si Salama Kalon,yara sa legal ang edad kag residente sang amo man nga banwa.
Suno sa impormasyon, upod ni Kalon ang iya bana kag lima nila ka bata sang natabo ang trahedya samtang nagatabok sila sa Lake Buluan nga sakop sang Barangay Maslabeng.
Base sa dugang nga mga impormasyon, gin igo suno pa sang mabaskog nga buhawi ang ila ginasakyan nga bangka resulta sang pagbaliskad sini kag ginadala man ini sang mga mabaskog nga mga balod.
Samtang, sa tunga sang peligro nahimo pa ni Salama nga maluwas ang iya isa nga bata paagi sa pag saka sa nagbaliskad nga bangka kag ang amay upod naman ang apat pa nila ka anak kag nagapadayon nga nagalanguy sa tunga sang mabaskog nga balod.
Apang, bangud sa hangin kag kabaskog sang mga balod, nadulaan sang kusog si Salama tubtob nga siya nalunod sa tubig. Makaligad ang pila ka oras nakita sang mga nag rescue ang lawas ni Salima nga wala na sang kabuhi.
Sa karon yara na sa maayo nga kahimtangan ang mga bata ni Salama kag padayon nga gina tagaan sang medikal nga atensyon.
Nagpaabot naman sang pauna nga bulig kag pakigbuylog sa kasubo ang lokal nga pamunuan sang Buluan sa mga pamilya.
