Gin deklara sang mga doktor nga dead on arrival ang duha ka mag-live in partners matapos ma-imbolbar sa aksidente sa National highway sang Crossing Jacinto, Brgy. Crossing Rubber, Tupi South Cotabato pasado alas 6:35pm kagab-i Nobyembre 08, 2025.
Ginkilala ang mga biktima nga sanday alyas Rigor kag Ruffa Mae, lunsay residente sang Sitio Dataltah sa Barangay Acmonan sa Tupi.
Base sa report sang mga awtoridad, sang ginasubay sang mga biktima ang nasambit nga dalanon hinali nalang ini nabungguan sang Toyota Hilux, ang likod sang ila single motor rason nga natabog ang duha ka mga biktima kag nakaangkon sang seryuso nga physical injury.
Samtang, ang nakabunggo sa ila ginkilala nga si “Marco,” 42-anyos, residente sang Barangay San Isidro, General Santos City, nga amo ang nagamaneho sang Toyota Hilux.
Gilayon naman nga nag padulong ang mga rescuers nga naghalin sa MDRRMO kag BFP sang Tupi agud nga dal-on ang mga biktima sa hospital, apang pag-abot sa nasambit nga balay-bulngan gin deklara nga dead on arrival ang 2 ka mga Biktima.
Sa subong ang amo nga pick-up truck, upod ang driver, yara na sa kustodiya sang Tupi Municipal Police Station para sa nagakaigo nga disposisyon.
