KORONADAL CITY – Pagasapulan na sang pamunuan sang Bangsamoro Government ang petsa sang una nga hugada sang Decommissioning process ukon pagsurrender sang mga matag-as nga sahi sang armas sang mga miyembro sang Moro Islamic Liberation Front agud tigayon na nga makapangabuhi sang normal kag kabahin sang peace process.
Sa ekslusibo nga interbyu sang Bombo Radyo Koronadal kay BARMM executive secretary kag head sang Department of Information nga si Abdullah Kusain, ginpahayag sini nga nakasumiter na sila sang inisyal nga listahan sang mga MILF members nga igapaidalom sa decommissioning process.
Dugang pa sini nga ginpangunahan naman ni Bangsamoro Transition Commission chairman Muhaguer Iqbal ang paghatag sang listahan sang MILF members sa International Decommissioning body.
Nahibaluan nga tatlo ka hugada ang decommissioning process nga igapatigayon sa Cotabato City sa madali nga tion.
