KORONADAL CITY – Gilayon nga gindala sa hospital ang isa ka lineman matapos nga makuryente samtang nagakay-o sang linya sa kalabaon sang JM Robredo Avenue, Purok Felipe, Barangay San Isidro malapit lang mismo sa likod sang Koronadal City Hall pasado alas-9 kaina sang aga.
Ginkilala ang biktima nga si Laddy Amit, yara sa legal nga edad kag residente sang Panabo City.
Suno sa groundman nga nakakita sang aksidente nagabitay na si Laddy kag wala nagahulag sang makita sini gani gilayon sila nagresponder agud ini ang mabuliga.
Sa interview naman sang Bombo Radyo kay Teddy Amit, utod sang biktima, nagakay-o suno pa ang iya utod sang mga kable sang kuryente sang wala niya na diparahan nga naigo sa isa ka live wire ang punta nga ginauyatan sini nagin kabangdanan sang iya pagkakuryente.
Dugang pa ni Amit, nga sang ginpapanaug na ang iya utod makaistorya pa ini kag gilayon nga gindala sa hospital.
Sa karon padayon pa nga ginabulong ang biktima kag ginaobserbahan matapos nga makuryente.
