Kumpirmado nga lima ang patay sa nagluntad nga banggaanay ang duha ka motorsiklo sa Barangay Road, Brgy. Crossing Rubber, Tupi, South Cotabato, Marso 2, 2025, pasado alas 9:12 sang gab-i.
Ini ang ginkumpirmar ni Jed Patrick Loreno, ang Emergency Medical Technician Team Leader sa Tupi sa panayam sang Bombo Radyo Koronadal.
Ang mga nalakip nga motor amo ang isa ka XRM 125, itom ang duag kag ginamaneho ni alias “Boy,” 20-anyos, lalaki, single, laborer, kag residente sang Brgy. Crossing Rubber. Wala ini sang driver’s license kag OR/CR. Upod sa iya ang duha ka back riders nga sanday alias “Darel,” 19-anyos, lalaki, single, laborer, kag alias “Ikay,” babaye, legal age, residente sang Brgy. Cebuano.
Ang mga nasambit nga sakay sang XRM 125 ang patay sa nagluntad nga aksidente.
Ang isa pa nga motorsiklo amo ang Rusi 125, itom ang duag kag ginamaneho ni alias “Christian,” 20-anyos, single, kag isa ka pribado nga empleyado nga residente man sang Brgy. Crossing Rubber. Wala man ini sang driver’s license kag OR/CR.
Upod sa iya ang back rider nga si alias “John,” 14-anyos, estudyante, kag residente sang Brgy. Bololmala.
Base sa inisyal nga imbestigasyon, ang XRM 125 nagabiyahe pakadto sa Brgy. Cebuano, samtang ang Rusi 125 nagahalin sa opposite nga direksyon pakadto sa Brgy. Crossing Rubber nga may madasig nga pagpadalagan.
Pag-abot sa lugar sang aksidente, nadulaan sang kontrol si Christian (Rusi 125) kag naglapaw ini sa pihak nga linya nga nagresulta ini sa head-on collision sang duha ka motorsiklo.
Bangud sang kakusog sang impact, gilayon nga napatay ang duha ka drivers kag duha ka back riders sang XRM 125.
Samtang, si alias “John,” ang back rider sang Rusi 125, nakaagom sang pilas sa nagkalain-lain nga parte sang iya lawas kag gilayon nga gindala pa sa balay bululngan apang gindeklara nga patay pasado 3:30 sang kaagahon kaina, Marso 3, 2025.
Sa karon, ang duha ka motorsiklo yara na sa kustodiya sang kapulisan para sa nagakaigo nga disposisyon kag mapadayon ang imbestigasyon sang mga otoridad sa nagluntad nga insidente.
