KORONADAL CITY– Panibag-o nga sunog na naman ang napagkit sang Koronadal City Fire Station pasado alas 3:00 kaina sang kaagahon sa syudad.
Ginpahayag sa Bombo Radyo Koronadal ni FO1 Joerick Abalos nga duha ka ancestral house ang nasunog sa bahin sang Imperial St., Brgy. GPS, Koronadal City nga ginaukupar sang lima ka pamilya kalakip na ang ila mga boarders.
Nagaguwa suno pa sa imbestigasyon nga gikan ang sunog sa kwarto sang isa ka boarder nga si Jade Delos Santos kun sa diin nakaangkon man ini sang 2nd degree burn matapos nga makaangkon sang paso sa nagkalain lain nga bahin sang iya nga lawas nga sa subong nagapaayo sa balay bululngan.
Suno kay FO1 Abalos, nakainom suno pa si Delos Santos kag lima ka gab e na nga wala sila sang kuryente rason nga kandila ang gin usar sang mga ini apang wala pa ginkumpirmar kun ini ang nangin tunaan sang sunog bangud may mga ginalantaw pa nga anggulo.
Samtang nagalab-ot naman sa P90,000 ang damyos nga napagkit sang BFP sa nasambit nga sunog.
Gindeklarar ini nga fired out alas 3:43 sang kaagahon.
Madumduman nga kahapon, isa ka sunog man ang nagluntad sa Brgy. Morales, Koronadal nga may damyos nga P100,000.
