KORONADAL CITY – Yara na sa kustodiya subong sang mga otoridad ang lider sang isa ka notoryos organized crime group kag 3 ka iban pa nga mga kaupdanan sini makaligad nga maarestar sa ginpatigayon nga joint operation ng 33rd Infantry Makabayan Batallion kag Special Action Force (SAF) sa bahin sang Brgy. Kayaga, Pandag Maguindanao.
Sa interbyu sang Bombo Radyo Koronadal kay 33rd IB Commanding Officer Lt. Col. Harold Cabunoc, wala na nakabato pa ang mga suspek nga ginapamunuan ni Dante Dalaten sang ginsulod sang militar kag kapulisan ang ginakutaan sang mga ini.
Ang grupo ni Dalaten ang involbado sa pagduso sang droga kag nagkalain-lain nga krimen sa probinsiya sang Maguindanao.
Nakuha sa posisyon sang mga suspek ang 26 grams sang shabu nga yara sa P125,000, nagkalain-lain nga sahi sang armas luthang, granada kag mga drug paraphernalia.
Ginpanginwala naman ni Cabunoc nga mga katapu sang Maute terror group ang mga naarestar kasubong sang una nga naguwa nga report.
Natalana naman nga pasakaan sang patong-patong nga kaso ang mga suspek.
