KORONADAL CITY – Yara na sa kustodiya sang militar ang lider sang isa ka armed lawless group (ALG) kalakip na ang mga kaupdanan sini makaligad ang nagluntad nga engkwentro sa bahin sang Purok Galmak, Barangay Baumol, Lambayong, Sultan Kudarat.
Sa interbyu sang Bombo Radyo Koronadal kay Wesmincom spokesperson Major Arvin Encinas, target sang nasambit nga operasyon si Kumander Tugali Guiamal Galmak.
Gilayon nga nagbaylohanay sang lupok ang magtimbang nga bahin nga nagresulta sa pagkapatay sang 5 ka bandido kag ginkapilas sang 9 nga iban pa, samtang isa naman ang pilason sa bahin sang militar.
Makaligad ang nasambit nga engkwentro, naarestar sang mga katapo sang 40th Infantry Battalion si Kumander Tugali kaupod ang 15 nga mga kaupdanan sini.
Nakuha man sa posesyon sang mga ini ang mga matag-as nga kalibre nga mga armas kag mga pampasigabong.
Gindayaw naman ni WestMinCom Commander Lt. Gen. Cirilito Sobejana ang tropa kag ginpahanumdoman nga ipabilin ang kalinong sa Mindanao batok sa nasambit nga mga grupo.
