KORONADAL CITY – Hugot nga ginkundenar sang Local Government Unit sang banwa sang Tantangan, South Cotabato ang pagpatay sa duha ka motorista kag pagpang-agaw sang ila nga motorsiklo kahapon nga adlaw sang Domingo..
Sa interview sang Bombo Radyo Koronadal kay Mayor Timee Joy Gonzales, ginakasubo sini ang nagluntad nga pagpang-agaw sang motorsiklo kun diin duha ang napatay nga ginlakipan nanday Levimar Moderacion, 33-anyos, may asawa kag residente sang Barangay Paraiso, Koronada City kag Daryll Nuqui, isa ka Grade 12 student, kag residente sang Brgy. Bukay Pait, Tantangan, South Cotabato.
Suno kay Mayor Gonzales, hugot nga ginakondenar sangn iya pamunuan kag sang mga pumuluyo sang ila nga banwa ang natabo kag nagalaum nga mahatagan sang hustisya ang pagkamatay sang mga biktima.
Aminado ang alkalde nga apisar ginapatuman ang hugot nga pagbantay sang kapulisan apang nalutsan ang mga ini sang motornappers.
Kadungan sini, ginpasiguro man sang opisyal sa nabikin nga pamilya sang tagsa ka biktima nga magapatigayon sang maidid nga imbestigasyon ang kapulisan agud nga madakpan ang mga suspek.
Sa pagkamatuod, nagpatigayon sang pagsinapol ang alkalde kaupod ang kapulisan, allied forces kag mga barangay officials agud makahimo sang paagi nga indi na magluntad pa ang kasubong nga krimen.
Ginhingyo man sang alkalde ang kooperasyon sang tanan agud nga madakpan ang mga suspek kag indi na magluntad pa liwat.
