Nakapauli na sa puluy-an sini sa bahin sang banwa sang Surallah, South Cotabato ang patay nga lawas sang isa ka katapo sang Intelligence Service of the Armed Forces of the Philippines (ISAFP) nga nalakip sa 3 ka mga kasuldaduhan nga napatay sa naluntad nga pagpang-ambush sa bahin sang Barangay Baimbing, Lamitan City, sang Lunes sang gab-e Disyembre 23, 2024.
Napuno naman sang pagtalalangis kag hilibion ang puluy-an ni Sgt Joecel Catedral samtang ginapanaog ang patay nga lawas sini sa isa ka helicopter sa bahin sang Surallah South Cotabato si Sgt Joecel Catedral ang residente sang Sitio Bagong Lipunan, Barangay Tubi-ala, Surallah , South Cotabato.
Madumduman nga isa si Sgt Catedral sa 3 ka mga katapo sang Intelligence Service of the Armed Forces of the Philippines (ISAFP) nga napatay sa pagpang-ambush kalakip man sanday Sgt Jhonrey Lapinig kag Pvt Archie Cabueños.
Suno sa report sang Lamitan City Police Station kag Basilan Provincial Police Office sakay sang isa ka van ang mga biktima sang ginpaulanan ang mga ini sang bala sang mga armado nga kalalakihan.
Ginkumpirmar naman ni Brig. Gen. Romeo Juan Macapaz, director sang Police Regional Office-Bangsamoro Autonomous Region nga dead on the spot ang tatlo ka mga biktima bangud sa tuman kadamo nga igo sang bala sa kalawasan sang mga ini.
Naga padayon naman ang pag-imbestigar sang mga otoridad sa grupo nga yara sa likod sang pagpangluthang sa mga biktima.
