KORONADAL CITY– Tuman ang pagpasalamat sang isa ka Law Working student halin sa probinsya sang South Cotabato makaligad nga malakip ang iya nga pangalan sa mga nakapasar sa 2018 Bar Exams.
Sa esklusibo nga interbyu sang Bombo Radyo Koronadal kay Atty Mae Fretzel Deadio, 33-anyos kag residente sang Edwards, Tboli, South Cotabato isa ka handum ang iya nga natuman indi lang para sa iya nga kaugalingon apang mangin man sang iya nga Retired Principal nga lola nga childhood dream suno pa nga mangin isa ini ka abogado.
Suno kay Deadio, wala nangin mahapos ang iya nga gin-agyan bangud gindungan sini ang pagtu-on sa Law School sa Central Philippine University- College of Law sa Iloilo City kag ang pagka-working student.
Magluwas suno pa sa kadunganan nga nakuha sa pagkapasar sa Bar Exams, luyag man sini nga mangin mangin inspirasyon sa mga kabataan sa kanilang lugar nga wala sang imposible sa tawo nga may handum.
Gin-insister man sini nga ang pagsuporta sang pamilya at pagtuo sa Dyos ang iya nga nangin inspirasyon.
Ginahalad sini ang iya nga kadalag-an sa tanan nga nagpangamuyo kag nagbulig sa paglab-ot sang iya nga handom nga mangin isa ka abogado.
Sa karon, plano sini nga hatagan sang importansya ang may kaangtanan sa Environmental Laws.
