KORONADAL CITY – Temporaryo nga indi maagyan sang mga motorista ang dalan padulong sa Sitio Upper Ladol, Barangay Assumption, Koronadal City matapos nga magluntad ang landslide sa nasambit nga lugar kaina sang hapon tuga sang mabaskog nga buhos sang ulan.
Ini ang ginkumpirmar ni City Disaster Risk Reduction and Management Officer Cyrus Urbano sa interview sang Bombo Radyo Koronadal.
Suno kay Urbano, natabunan ang alagyan bangud sa natiphag nga duta matapos ang mabaskog nga ulan halin kaina sang hapon.
Gilayon nga nagpadala ang City Engineering Office sang heavy equipment agud magsugod sa clearing operation kag matapna ang pagdamo pa sang mga debris sa dalan.
Samtang, nagapadayon ang operasyon, ginapanawagan ni CDRRMO head Cyrus Urbano sa mga residente kag motorista nga likawan anay ang pag-agi sa lugar samtang ginahimo ang clearing works agud malikawan ang disgrasya.
