MAGUINDANAO DEL SUR — Land conflict kag family feud ukon rido ang ginalantaw nga posible nga motibo sang mga otoridad sa nagluntad nga pagpang-ambush patay sa convoy ni Commander Toabak Sangki Kindo sa bahin sang Barangay Kapimpilan, Ampatuan, Maguindanao del Sur.
Ini ang ginpahayag ni LTCOL Roland Suscano, Spokesperson sang 6th Infantry Division Philippine Army (6ID PA) kag Joint Task Force Central, sa interview sang Bombo Radyo Koronadal.
Suno sa iya, isa sa mga ginalantaw nga anggulo amo ang away sa duta, bangud may mga nahauna na nga mga settlement nga nagluntad sa pila ka mga base command sang Moro Islamic Liberation Front (MILF) nga may kaangtanan sa mga isyu sa lupa kag boundary.
Madumduman nga ginkilala ang mga biktima nga sanday Commander Toabak Sangki Kindo, kasamtangan nga Battalion Commander sa idalom sang 1st Brigade, 118th Base Command, Central Mindanao Front, BIAF-MILF, kag ang iya drayber nga si Boy Sangki.
Suno sa mga himata sang mga biktima, pauli na kuntani sanday Kindo sang hinali lamang ini gin-ambush sang mga wala pa matumod nga mga suspek.
Nakaagom sang madamo kag tuman nga igo sang bala ang lawas sang mga biktima nga gintunaan sang ila gilayon nga kamatayon.
Sa karon, padayon pa ang imbestigasyon sang mga awtoridad agud matumod ang pagkakilal-an sang mga suspek kag ang matuod nga motibo sa likod sang krimen.
Ginpasiguro man sang militar nga kontrolado ang sitwasyon sa lugar agud mapabilin ang kalinong kag kaluwasan sang mga residente.
