Dako ang pasalamat sang pamilya Descuatan nga nahatagan na sang hustisya sa sa sulod sang 24 ka tuig sa ila nga bata nga estudyante.
Ginkilala ang biktima nga si Gerald “Doxcin” Descuatan nga residente sang Barangay Poblacion, Norala, South Cotabato kag naga-eskwela sa Norala, National High School sang tuig 2001 kun diin nagluntad ang insidente.
Sa interview sang Bombo Radyo Koronadal kay Tata Descuatan, utod sang biktima nalipay sila nga nahatagan na sang hustisya sa ang kamatayon sang iya utod bangud nadakpan na ang nagsumbag sa iya nga gintunaan sang iya kamatayon sang tinalikdan nga Agosto 5,2025.
Suno kay Tata, nga napatay sang iya nga kaklase sang 2001 sang iya classmate nga ginkilala kay Gerald D. Estrellanas nga residente man sang nasambit nga banwa apang nagpalagyo matapos mahimo ang krimen.
Gindugang pa ni Tata nga bangud lamang sa away bata ang ginhalinan sang tanan. Nagbaisay suno pa ang duha sa isa ka brand sang gamit tubtob nga ginsumbag sang suspek ang iya manghod.
Wala nagpadayon ang kaso sang una bangud wala na sang may nag-asikaso sa ila nga pamilya kay tanan sila man ang naghalin sa nasambit nga Banwa.
Apang, ginpa-re-open ini sang iya iloy nga yara na sa Amerika subong kag tigayon gid nga nadakpan ang suspek sa ginapuy-an sini sa Purok Guadalupe, Barangay Sawata, San Isidro, Davao del Norte.
Sa karon, yara na sa kustodiya sang Norala PNP ang suspek kag natalana nga atubangon ang panumbungon batuk sa iya.
Nagapasalamat naman si Tata sa mga otoridad labi na sa nagbulig nga madakpan na ang suspek.
