Arestado sa gihapon ang isa ka lalaki nga kawatan apisar nga nagpakuno-kuno ini nga isa ka babaye pinaagi sa pagsuksok sang blonde nga wig, dress kag nagsuksok sang oversized sunglasses agud makalikaw sa mga kapulisan.
Natigayon nga naaresto si Joshua Kolotka, 33-anyos, sa Florida Heartland sang mga otoridad nga naga-imbestigar sa pagpangawat sang baroto sa Old Caloosa Lodge area sa Lakeport.
Sandig sa report, samtang nagapatigayon sang follow up investigation ang kapulisan sa lugar para sa isa ka lalaki nga gintumod nga suspek sa kaso, isa ka imbestigador ang nakatalupangod sa isa ka blonde nga babayi suksok ang puti nga cardigan kag light blue nga dress kag naka-sports sunglasses nga nagagwa sa isa ka balay.
Sang ginpapondo sang mga ini, didto na nila natukiban nga ang babaye nga ginadahum-dahom nila isa gali ka lalaki nga nagapakuno-kuno.
Nadiskubre naman sang mga ini nga ang lalaki nga nagapakuno-kuno amo ang ila ginapangita nga suspek, gilayon naman giskustodiya sang kapulisan si Kolotka kag gin-aresto pinaagi sa duha ka warrant of arrest.
