KORONADAL CITY – Narescue kag ginbuligan ang isa ka lalaki nga makapauli diri sa siyudad sang Koronadal matapos nga naghana nga maglumpat halin sa mataas nga edifisyo sa siyudad sang Tacurong.
Ginkilala ini kay Jester Gaitera, 26-anyos kag residente sang Barangay Sta. Cruz, Koronadal City.
Sa interview sang Bombo Radyo Koronadal kay Kagawad Venus Aroso, sila ang nagsugat kay Gaitera matapos nga gintawagan sila sang kapulisan angot sa ginhimo sini.
Suno kay Kagawad Aroso, tuman ka luya kag halos indi maistorya sa maayo si Jester sang ginsugat nila ini agud dal-on pauli sa ila panimalay.
Sa panaysayon ni Jester, halin ini sa iya ubra sa Maguindanao kag magapauli na kuntani sa siyudad sang Koronadal.
Apang bangud suno pa sa mga kaupod sini sa trabaho nga nagahangkat sa iya sang inaway nadula ini sa husto nga panghuna-huna tubtob nga nagsaka sa Fitmart Department Store kag naghana nga maglumpat.
Maayo na lamang kag nakit-an ini kag nabuligan nga makapanaug tubtob nga makapauli sa Koronadal.
Nahibaluan nga ginpakaon ini kag ginpatiner pa sang pila ka adlaw sa Barangay Hall sang Barangay Sta. Cruz bangdud indi ini magpauli kag tuman pa ka luya.
Nagpasalamat naman sang dako ang pamilya ni Jester nga nabuligan ini nga makapauli.
Sa karon, pagatutukan sang barangay council ang kondisyon ni Jester ilabi na ang mental health sini agud indi na masulit pa ang ginhimo sini nga hana nga paglumpat sa edifisyo agud utason ang iya nga kabuhi.
