KORONADAL CITY – Pagapasakaan sang kaso nga paglapas sa Presidential Decree No. 1727 ukon kilala bilang Anti-Bomb Joke Law ang isa ka lalaki nga naglahog sang bomba sa banwa sang Isulan, Sultan Kudarat.
Suno kay Bombo correspondent Larry Geronio sa interbyu sang Bombo Radyo Koronadal, ginkilala sang kapulisan ang lalaki nga si Antonio Salobre, 30 anyos kag residente sang Brgy Kalawag 3 sa nasambit nga banwa.
Madumdoman nga sa nasambit nga banwa nagsigabong ang bomba nga nagpatay sa tatlo ka tawo kag ginkapilas sang masobra 30 nga iban pa sa tion sang 7th Hamungaya Festival.
Base sa ginpatigayon nga interogasyon sang mga otoridad, apesar wala sang kamatuoran sa bomb joke ni Salobre, apang nagtuga naman ini sang kahadlok kag kabalaka labi pa nga lab-as pa sa mga pumuluyo ang mga nagluntad nga pagpamomba.
Sa idalom sang Anti-Bomb Joke Law, pagapamultahon ang sin-oman nga mapamatud-an nga nakasala sang P40,000 kag posible nga pagkapreso sang tubtob lima ka tuig.
