Nagpasaka sang kaso ang isa ka 40 anyos nga Italian batuk sa isa ka doktor kag duha ka medical clinics matapos nga nagbayad para sa pagpadako sang iya kinatawo apang nagresulta lamang sa “impotence kag erectile dysfunction.”
Ang wala ginhingadlan nga lalaki nagikan sa Tuscany, Italy ang nag-alegar nga nagbayad sia sa isa ka cosmetic surgeon sa balor nga 5,000 euros ukon masobra sa P300, 000 para sa pagpadako sang iya kinatawo, apang pagkatapos sang isa ka bulan, nagtawag sia sa doctor kag nagreklamo bangud sa physical discomfort.
Ang lalaki ang nagpaidalom sa 12 ka procedure sa tinutuyo nga makay-o ang palpak nga surgery.
Sa court documents nga nakuha sang isa ka Italian news media, ang lalaki ang may duha ka lipofilling operations kun sa diin, ang tambok sa nagkalain-lain nga bahin sang iya lawas ang ginsaylo sa iya kinatawo agud nga ma-adjust ang shape sini.
Sa malain nga palad, wala sini nakuha ang ginahandum nga epekto bangud nga wala na-maintain ang expected shape kag volume.
Sa isa pa ka source, gin-alegar sang lalaki nga nagpaidalom pagid ini sa iban pa nga procedure agud nga i-repair ang iya genitals apang naglala pagid ang sitwasyon.
Suno sa mga eksperto, ang iban nga procedures ang naggamit sang silicone nga gin-ban na sang 1993.
Matapos ang palpak nga procedure nga nagresulta sang pag-deform sang iya kinatawo kag indi na magamit sa sexual act, ang lalaki ang ginpanugyanan nga magpaidalom pagid sa isa ka surgery rason nga nagdesisyon nalang ini nga magpasaka sang kaso sa doctor kag sa medical facilities kun sa diin ginpatigayon ang procedures.
Nagdepensa ang doktor kag suno sa iya, nalipay man sa una ang pasyente sa resulta sang operation kag sa pagkamatuod, nagpasa pa ini sang videos sa iya bilang pamatuod kag nagpirma man ini sang consent.
Apang wala ini ginpatihan sang korte bangud nga wala sang ihibalo ang pasyente sang risgo kag ang satisfaction sa resulta sang operasyon ang wala na sang importansya sa rason nga trabaho na sang healthcare professional nga i-evaluate ang resulta sang procedure.
Samtang, ang duha naman ka mga clinic nga na-ulamid ang nagtuyo pa nga maglikaw sa responsibilidad bangud nga suno sa ila, nagpahulam lamang sila sang ila pasilidad sa doctor. Apang suno sa korte, nagbenepisyo man ang mga ini sa trabaho sang doctor.
Bangud sini, ginmanduan ang doctor nga magbayad sang 60 percent nga compensation samtang ang clinic ang ginpabayad sang tag-20 percent ang kada isa.
Ang compensation ang gintalana sa 153,000 euros ukon masobra sa P9 million apang ang nakuha sang pasyente ang dira lamang sa 110,000 euros ukon masobra sa P6 million bangud nga suno sa korte, 30 percent sang damage sa iya genitals ang bangud sang iya sala.
Gin-ako sang lalaki nga nagtublok sia sang injection sa iya kinatawo sa ila balay base sa prescription sang amo nga doktor gani nagdesisyon ang korte nga may contribution man sia sa deformity kag sa erectile dysfunction.
