KORONADAL CITY – Nagakabalaka na ang mga Kuwaiti employers makaligad ginpatuman sang gobyerno sang Pilipinas ang total deployment ban sang mga OFWs sa ila pungsod.
Ini ang ginpakigbahin ni Teresa Margate, isa ka Pinay domestic helper nga isa ka tuig na nga nagaobra sa Kuwait sa interbyu sang Bombo Radyo Koronadal.
Suno kay Margate nga tumandok sang Iloilo, apektado man sa kontrobersiyal nga Villavende case ang mga maayo nga mga amo bangud madalahig sila sa mapintas nga mga employer.
Dugang ni Magarte, nahadlok ang iya amo nga kun pwersahan sila nga paulion kag indi na sila makabalik wala na sang may maga-amuma sa ila labi na nga mga Pinay ang mga nanamian nila nga mag-obra bangud mapisan sa ila responsibilidad.
Ginpakigbahin man sini nga kun ang amo lamang niya ang pamangkuton, mas maayo nga luguson man kag kastiguhon tubtob sa mapatay ang babaye nga employer nga nagpatay kay Jeanelyn.
Sa ulihi, ginaawhag niya ang Duterte administration nga ipadayon ang pagpatuman sang total deployment ban agud madudla ang mga mapintas nga mga employer.
