Korte Suprema, ginpahanumdom ang mga employers nga obligado mag-issue sang payslip sa ila mga empleyado

Ginpahayag sang Korte Suprema nga kinahanglan mag-issue sang payslip ang mga employer agud mapamatud-an nga nabayaran gid ang ila mga empleyado sang ila suweldo.

Ang kaso naghalin sa reklamo sang 2001 nga ginpasaka sang 49 ka piloto sang Philippine Airlines (PAL) matapos sila gin-terminate sang ila trabaho bangud sang pagwelga nila sang 1998 batok sa indi patas nga mga hilikuton sang PAL sa pagdumala sang labor.

Sang 2013, ginpahayag sang Court of Appeals nga wala nakapakita sang pamatud-an ang PAL nga nabayaran sini ang suweldo, mga allowance, kag 13th month sang ila anay nga mga empleyado.

Ginsuportahan sang Korte Suprema ang desisyon sang appellate court subong nga tuig.