KORONADAL CITY – Masinadyahon nga ginpakigbahin sang talatapan sang Koronadal City Tourism ang mga aktibidad nga nakalinyada kadungan sang selebrasyon sang Chinese New Year sang mga Koronadaleños.
Sa interview sang Bombo Radyo Koronadal, ginpahayag ni Koronadal City Tourism Officer Mr. Elric Batilaran ang pagpakig-isa sang lokal nga pang-ginobyerno sang koronadal sa mga Filipino-Chinese kag pamilya sang mga ini sa syudad sa nasambit nga selebrasyon.
Ginpahayag man sini nga kada tuig masadya, magahod kag madinuagon ang selebrasyon sang Chinese New Year nga ginakalakipan sang Lion kag Dragon Dance sa diin naga pakita sang masadya nga saot sang duha ka mga mascots nga dragon kag Lion nga ginapatihan man nga magadala sang grasya sa kada pamilya.
Nag-agi man ang mga ini sa mga opisina sa Koronadal City Hall kag ginakaun sang mga ini ang mga ampao ukon Red pockets nga ginasab-it sa saramputan ang mga opisina nga may unod nga kwarta.
Ginasunod naman ang Dragon kag ang Lion sang mga magahod nga mga instrumento nga masadya nga nagahampak sang mga ini agud mangin masadya ang pagsaut sang mga ini.
Gindugang pa ni Batilaran nga madamo na sang mga pagpati kag tradisyon sang mga Chinese ang naadoptar sang mga Pilipino kag maobserbaran man diri sa siyudad sang Koronadal.
