KORONADAL CITY – Nagpromisa ang mga local government sang Koronadal City kag Bacolod City nga ila pagabuligan ang walo ka mga construction workers nga nagaobra sa isa ka mall nga tumandok sang Bacolod kag Negros Occidental nga na-stranded diri sa siyudad sa sulod sang masobra duha ka bulan.
Suno kay Elric Batilaran sang Task Force Bulig Kontra Covid, nahatagan na ang mga ini sang bulig sa una nga hugna sang pagpanagtag sang food packs, kag nakabaton man sila sang benepisyo sang SAP halin sa DSWD.
Kinahanglan lamang suno pa ang medical certificate kag travel authority halin sa PNP regional office agud mapahanugotan sila nga makaguwa sang rehiyon pakadto sa iban nga LGU tubtob sa makauli sa Bacolod.
Magluwas diri, mas maayo suno pa kun may certificate ukon letter of acceptance halin sa Bacolod agud mangin balasehan sa ila pagbalik kag masulhay ang ila pagpauli.
Sa bahin naman ni Bacolod City Councilor Cindy Roxas, nga chair man sang Action team for Non-OFW Returning Residence, ginpasiguro sini nga pagaaksyonan sang Bacolod LGU ang repatriation sang mga ini.
Kinahanglan lamang suno pa nga ipahibalo sang mga ini kun taga-diin sila nga barangay agud nga ang ila mga barangay officials ang maga-forward sang impormasyon sa ila talatapan agud ila na ini nga hikutaron agud makapauli sila.
Ginaawhag man sini ang mga na-stranded ng mga kasimanwa nga kun may iban pa nga na-stranded diri sa siyudad, mas maayo nga tipunon na lamang agud indi mausik ang ila repatriation efforts.
Bangud sini, dako ang pagpasalamat sang walo ka mga taga-Bacolod nga na-stranded diri sa siyudad sang Koronadal nga nahimoan sang tikang agud tigayon na sila nga makapauli.
Suno kay Eugene Valencia sang Bacolod City nga nagatindog nga tagpamaba sang grupo, dako ang ila pagpasalamat sa pagpaningkamot sang Bombo Radyo Koronadal kag Bacolod sa pagpalab-ot sa mga local officials agud mahikutar ang ila mga himoon agud tigayon sila nga makapauli.
Magluwas kay Valencia, kalakip sa mga na-stranded sa siyudad sang Koronadal amo sanday Reyje Espina (Brgy. Handumanan, Bacolod City); Melchor Casipong (Brgy. Punta Taytay, Bacolod City); Harry Barena (Brgy. Punta Taytay, Bacolod City); Iver Caspe (Brgy. Hinigaran, Negros Occidental); Mark Anthony Zamora (Bacolod City), John Louie Desales (Bacolod City); kag Gefarel Ortaliz sang Brgy. Pulopandan, Negros Occidental.
