KORONADAL CITY- Nagtuga sang pagkaalarma sa pila ka mga Koronadaleños ang nagluntad nga bomb scare sa syudad pasado alas 3 sang kaagahon subong nga adlaw.
Sa impormasyon nga nakuha sang Bombo Radyo Koronadal isa ka itom nga backpack ang ginbilin sa atubang sang isa ka buluthuan sa bahin sang Alunan Avenue sini nga syudad.
Pila sa mga motorista kag street sweepers suno pa ang nahadlok sa pagpati nga ini ang may unod nga Improvised Explosive Device o IED.
Gilayon naman nga nagresponder ang Explosive Ordnance Disposal Team apang nag negatibo ini sa eksplosibo.
Kun madumduman nga una nga ginpasigabungan sang IED ang Koronadal nga gintarget pa ang Christ the King Cathedral kag gintanuman man sang isa ka IED ang isa ka convenience store kag sini nga nakaligad nga agusto narekober man ang isa ka IED sa tunga sang Koronadal International Folkloric Festival nga gintambungan sang 9 ka mga pungsod.
Sa Karun padayon ang pahanumdom sang Koronadal City PNP sa mga residente nga mangin vigilante sa tanan nga oras.
