Mas hugot nga seguridad ang ginapatuman sang Koronadal City Police Station sa mga buluthuan sa syudad bilang kabahin sang tikang sang Philippine National Police agud maprotektahan ang mga estudyante, mga manunudlo kag iban pa nga school personnel.
Ginpahayag ni PLtCol Harold Cornel, OIC sang Koronadal CPS, nga resulta ini sang mando halin sa PNP Central Office kasunod sang nagkalain-lain nga mga insidente sa pungsod nga nahanungod sa sulod sang mga buluthuan kag nagpakita sang panginahanglan nga mapabakod ang school security.
Kabahin sang preparasyon, nagpatigayon ang Koronadal CPS sang apat ka adlaw nga orientation, training kag seminar para sa tanan nga Barangay Tanod sa syudad.
Ginpangunahan ini sang LGU Koronadal kag Department of the Interior and Local Government ukon DILG agud mapataas ang kahigayunan sang mga tanod nga makabulig sa crime prevention kag pagmintinar sang kalinong sa tagsa ka barangay.
Ginpahibalo man sang hepe nga naghiwat sila sang koordinasyon kag pagsinapol upod sa mga school principals kag security personnel agud mapalig-on ang contingency measures kag mapadamo ang police visibility sa sulod kag palibot sang pampubliko kag pribado nga mga institusyon.
Suno kay Cornel, ang mas hugot nga koordinasyon sa tunga sang kapulisan, buluthuan kag komunidad ang isa sa pinakaepektibo nga pamaagi agud mapunggan ang mga insidente antes pa ini matabo kag mapabilin nga luwas ang mga kabataan.
