Hugot nga ginkundenar sang United Bangsamoro Justice Party (UBJP) ang brutal kag wala kaluoy nga pagpatay kay Mohammad “Katumbok” Alamada sa sulod mismo sang restaurant sini sa Buluan, Maguindanao del Sur.
Si Alamada ang isa ka public servant nga nagserbe bilang konsehal sa nasambit nga banwa kag Deputy Municipal Executive Officer sang UBJP.
Siya man ang Chairman sang MILF Political Committee sa Buluan kag aktibo nga nagatrabaho agud iduso ang katarungan, kalinong, kag pag-umwad sang ila lugar.
Kaangot sini, nagapanawagan sang hustisya ang pamilya sang biktima kag ang mga kaupdanan sini sa UBJP.
Nagapadayon naman ang imbestigasyon sang mga kapulisan sa kun sin-o ang may kahimuan sa pagpatay sa biktima kag kun ano ang motibo.
Suno naman kay Maguindanao del Sur PNP Provincial Director PCol. Roel Sermese isa na ang natumod nga persons of interest sa nasambit nga krimen, pila naman sa mga anggulo nga ginalantaw sang mga otoridad sa subong ang may kaangtanan sa trabaho, negosyo kag personal nga kabuhi sang biktima.
