KORONADAL CITY– Yara na sa kustodiya sang mga otoridad ang isa ka konsehal nga naarestar sa banwa sang Upi Maguindanao matapos nga magpositibo kag makwaan sang mga armas luthang kag bala sa sulod mismo sang puluy-an sini.
Ginkilala ni Criminal Investigation and Detection Group-ARMM Provincial Field Unit Commander, PCI Esmail Madin ang suspek nga si Nurodin Salik Musa, yara sa legal nga pangedaron kag residente sang Brgy. Mirab, Upi, Maguindanao.
Suno kay PCI Madin, nagpatigayon sila sang operasyon bitbit ang 3 search warrant kontra kay Musa, nga ginpirmahan ni Judge Bansawan Ibrahim.
Maluwas sa pulu-yan sang konsehal, lakip man sang mga ginsulod amo ang puluy-an nanday Alimudin Musa Dalmabao kag Ahod Salik Musa, nga lunsay himata sang suspek apang nagnegatibo ang mga ini sa anuman nga kontrabando.
Dugang pa ni PCI Madin nga may nakalab-ot sa ila nga impormasyon nga suno pa naga-mentenar sang Private Armed Groups ukon PAGS kag ginpatihan nga protector man sang iligal nga droga ang nasambit nga opisyal rason nga sang makakwa sila sang warrant sa korte, gilayon nga ginpatigayon ang operasyon.
Sa karon ginpreparar na ang mga nagakaigo nga kaso nga isang-at batuk sa naarestar nga konsehal.
