KORONADAL CITY – Nagapadayon ang imbestigasyon sang mga kapulisan sa banwa sang Guindulungan, Maguindanao makaligad ginluthang sang mga suspek ang isa ka konsehal sang nasambit nga lugar.
Sa impormasyon nga nakuha sang Bombo Radyo Koronadal, ginkilala ang nasambit nga biktima nga si Councilor Morcid Lauban.
Sandig sa inisyal nga impormasyon sang kapulisan, nagluntad ang pagpangluthang alas 7 kaina sang aga samtang ginaasoy ni Lauban ang national highway sakay sang iya itom nga duag nga Toyota Hi-Lux sang hinali na lamang ini nga ginpalukpan sang mga suspek nga nakasakay sa motorsiklo.
Gilayon nga napatay si Lauban bangud sa madamo nga igo sang bala nga iya naangkon.
Pilason man ang duha sini nga kaupdanan nga konsehal sa nasambit nga pagpangluthang.
Naka-half mast subong ang mga hayahay sa municipal hall sang Guindulungan bilang pagpakita sang pakikiramay sa nadangtan sang nasambit nga konsehal.
Sa subong ginaimbestigaran na sang mga otoridad ang posible nga motibo sa pagluthang patay sa biktima kag ginahibalo kun sin-o ang mga posible nga mga suspek sa nasambit nga krimen.
