KORONADAL CITY – Ginapasiguro ni South Cotabato Governor Reynaldo S. Tamayo Jr. nga ginahimo na sang provincial government ang tanan nga tikang agud maresolba ang tensyon sa tunga sang mga Indigenous People kag Dole Philippines sa Barangay Landan, Polomolok, South Cotabato.
Suno kay Governor Tamayo, napalab-ot na sang Dole Philippines ang ila reklamo kag nagpatigayon na sang dayalogo kaupod ang general manager sang kompanya.
Diri ginpahayag ang ila commitment nga resolbahon ang mga isyu sa mga lugar nga ginapuy-an sang tribong Blaan sa bahin sang Tupi kag Polomolok.
Isa sa mga nakit-an nga rason sang tensyon amo ang alegasyon nga ginakuha sang pribadong serbisyo gikan pa sa Metro Manila ang operasyon sang mga cooperative kag manpower services, imbes nga tagaan oportunidad ang mga lokal nga trabahador sa South Cotabato.
Una diri, nagluntad anng tensiyon sa tunga sang tribu kag security guard sang Dole Phil upod ang pila ka pulis kun diin may pagpalupok sang armas nga napagkit kag nakuhaan sang video.
Apang, ginpanginwala ni Mayor Bernie Palencia ang alegasyon nga may nagluthang nga police-bodyguard sini sa ginluntaran nga insidente.
Suno kay Palencia, nagkadto ini sa lugar agud nga makigdayalogo kag solusyonan ang problema upod ang kapulisan kag security guard sang kumbuyuhan apang wala ginalauman nga may naguwa nga indibidwal nga may bitbit man nga armas.
Sa subong, ginasiguro ni Governor Tamayo nga padayon ang koordinasyon sa mga ahensya agud maprotektahan ang katawhan sang South Cotabato kag malikawan ang pagdako pa sang problema.
