KORONADAL CITY- Nagakadapat suno pa nga mas padalman pa ang imbestigasyon sa kamatayon ni Cadet 4/CL Darwin Dormitorio, ini ang ginpahayag ni anay Philippine Marine Corps Captain kag former Magdalo Representative Gary Alejano.
Sa interbyu sang Bombo Radyo Koronadal kay Alejano, indi lamang ang mga kadete nga may kaangtanan sa hazing ang nagakadapat nga magpanabat sa kamatayon ni Dormitorio bangud may palanabton man suno pa ang matag-as nga opisyal sang Philippine Military Academy.
Cadet 4CL Darwin Dormitorio
Dugang pa sini nga napaslawan suno pa nga aksyunan gilayon sang mga opisyal sang PMA ang insidente sang hazing sa una nga pagka confine pa lamang ni Dormitorio sa balay bululngan.
Samtang ipokrito man suno pa kun hambalon nga wala sang hazing sa sulod sang PMA bangud naga eksister ini.
Madumduman nga ginsapubliko na ang mga pangalan sang mga may kaangtanan sa hazing nga ginkapatay ni Dormitorio nga ginakabug-usan nanday Cadet 1CL Axl Rey Sanupao; Cadet 3CL Shalimar Imperial; Cadet 3CL Felix Lumbag Jr.; Cadet 3CL Tadena; Cadet 3CL Volante; Cadet 2CL Zacarias; kag Cadet 3CL Manalo.
Samtang sa pihak nga bahin, nagakadapat nga klaruhon ang isyu sang hazing kag sang paghatag sang disiplina sa mga kadete sa sulod sang Philippine Military Academy.
Sa interbyu sang Bombo Radyo Koronadal kay anay Magdalo Representative Gary Alejano, indi pwede tawgon nga heinous crime ang mga disiplina nga ginapatuman sa sulod sang PMA.
Dugang pa sini nga kinahanglan sang mga kadete ang disiplina agud nga ila ini mausar kun yara na sa aktwal na sitwasyon sa battlefield.
Indi pwede mangin mahumok ang isa ka suldado sa tunga sang pakig-away sa mga kalaban sang estado.
