Gindakop ang isa ka HPG kag miyembro sang Philippine Coast Guard nga sakay sang isa ka puti nga van nga nagbaliskad sa Diversion Road, Barangay Sinawal, General Santos City, sang Huwebes sang aga, Pebrero 20.
Suno sa report sang Sarangani PNP, halin sa Maasim, Sarangani Province ang van nga may karga nga mga karton sang smuggled nga sigarilyo kag naglikaw ini sa checkpoint sang mga pulis sa 2nd PMFC Sarangani.
Malapit pa ini mabunggo ang pulis sa lugar, rason nga ginlagas ini sang kapulisan.
Pag-abot sa kanto sang Litan, Diversion Road sa Barangay Sinawal, General Santos City, nadisgrasya ang van kag naglapta sa dalan ang mga sigarilyo.
May upod pa ini nga itom nga SUV.
Nakita nga ang SUV nagakarga sang tatlo ka box sang smuggled nga sigarilyo kag ginamaneho ini ni PSSg Rex Jalandoni nga nadestino sa HPG South Cotabato kag lunsay residente sang Tupi, South Cotabato.
Upod sa mga nadakpan ang miyembro sang Philippine Coast Guard nga si Gerant Gervacio kag duha pa ka indibidwal nga ginkilala nga sanday Kenneth Tabion kag Meljay Antugon.
Luwas pa sa smuggled nga sigarilyo, nakumpiskar man sang mga pulis ang mga armas, magazine kag mga bala sini.
Yara sa Kustodiya sang kapulisan sa Sarangani Province ang pulis, ang miyembro sang Coast Guard, kag ang ila duha pa ka kaupdanan para sa mas madalom nga disposisyon kag magatubang naman sa administratibo nga kaso.
