KORONADAL CITY- Ginakabig sa subong nga “Alarming” sang pamunuan sang Koronadal City Health Office ang padayon kag tuman nga pagsaka sang mga numero sang mga nakaangkon sang Human Immunodeficiency Virus-Acquired Immunodeficiency Syndrome o HIV-AIDS sa siyudad.
Ini ang nangin pahayag ni Mylene Seliote,Health Education and Promotions Officer o HEPO III sang Koronadal City Health Office sa interview sang Bombo Radyo Koronadal.
Suno sa opisyal, talulupangdon sa subong nga pagsaka sang kaso bangud man sa mas ginpasangkad nga monitoring kag testing sang ila nga pamunuan sa diin naguwa nga sobra 300 na ang napagkit nga kaso sini.
Gindugang pa sang opisyal nga nasambit nga numero naga panguna sa listahan ang mga lalaki nga nagakalatnan pinaagi sa pagpakighilawas sa kasubong man nila nga mga lalaki.
Sandig pa sa ila nga datus, 14 anyos ang pinakabata nga may ara sang HIV.
Isa naman sa mga nakita nga kabangdanan sang ila nga pamunuan amu ang madali nga access sa mga pornographic sites nga madali nga makita sang mga lamharon ang kaisipan para sa amu nga topiko.
Ang HIV amu ang isa ka impeksyon nga Sexually Transmitted Disease o STD ukon mahimo nga makuha pinaagi sa pagpakighilawas, blood transfusion, kag mahimo man nga mamana sang isa ka persona halin sa ila nga mga ginikanan nga positibo sa amu nga balatian.
Nagpaalinton naman ang ila nga pamunuan nga padayon nga maghalong batok sa ini nga mga balatian.
Bukas man nga magbaton ang ila nga pamunuan sa kun sin-o man ang luyag nga magpatest sang ila nga kaugalingon
