KORONADAL CITY- Naalarma ang mga pumuluyo sa siyudad sang Koronadal matapos malakip ini sa Top 5 nga may yara sang pinakamataas nga kaso sa HIV/AIDS sa Pilipinas.
Nahibaluan nga base sa datus nga ginpaguwa sang South Cotabato Provincial Integrated Health Office paagi kay HIV/AIDS focal person John Arlo Codilla masobra 30 na ang napagkit nga kaso sang HIV/AIDS sa siyudad sang Koronadal samtang yara naman sa masobra 500 sa bug-os nga probinsya sang South Cotabato kun diin 2 ang napagkit nga patay kag kadam-an sa mga infected ang mga myembro sang Lesbian, Gay, Bisexual, Transgender ukon LGBT community.
Sa interbyu sang Bombo Radyo Koronadal kay South Cotabato HIV/AIDS focal person John Arlo Codilla, nagalapta ang nasambit nga kaso sang sakit sa siyudad bangud sa indi luwas nga pagpakighilawas kag pag-angkon sang madamo nga sexual partners.
Sa pihak sini, nagpanawagan naman ang provincial health office sa tanan nga mga pumuluyo sa South Cotabato labi na sa siyudad sang Koronadal nga magpaidalom sa libre nga HIV screening agud nga mahibaluan kun positibo sa nasambit nga sakit kag makalikaw nga mapasa ini sa iban.
Pamatuod naman sa nasambit nga datos ang amat-amat nga pagkadula sang stigma nga magpaidalom sa HIV test paagi sa ginpahugtan nga kampanya sang mga health workers.
