KORONADAL CITY – Padayon ang pagpahanumdom sang mga health experts sa South Cotabato nga hugot nga ipatuman ang mga tikang batok sa balatian nga dengue makaligad naglab-ot na sa kapin 5,000 ang kaso sang nasambit nga balatian sa probinsya.
Base sa datos sang South Cotabato Integrated Provincial Health Office (IPHO) pinaagi kay Jose Baroquillo, nagalab-ot na sa 4,732 ang napagkit nga kaso sang balatian humalin sang Enero tubtob Hulyo 9 subong nga tuig.
Nagapabilin sa gihapon sa 22 ang mga nagkalamatay sa nasambit nga balatian.
Suno kay Baroquillo, nagapabilin sa gihapon ang siyudad sang Koronadal nga may pinakamadamo nga kaso sang dengue nga nagalab-ot sa 967 kaso, kun sa diin una nga nagpatuman sang dengue outbreak ang mga banwa sang Surallah, Banga, Tantangan, Sto Nino kag Norala.
Madumdoman nga gindeklarar sang Department of Health ang National Dengue Epidemic subong nga bulan sang Agosto bangud sa pagdamo sang kaso sang dengue sa bug-os nga pungsod.
