KORONADAL CITY- Pagalauman suno pa nga madugangan pa ang mga kaso nga ginsang-at batuk sa Kabus Padatuon Community Ministry International founder nga si Joel Apolinario, CEO nga si Reyna Apolinario kag iban pa nga mga kaupdanan sini angot suno pa sa ginapadalagan nga multi-billion peso investment scam.
Sa ekslusibo nga interbyu sang Bombo Radyo Koronadal kay NBI 12 Director Olivo Ramos, nagapadayon ang imbestigasyon sa mga kaso nga ginapangatubang sini kag posible nga makasang-at pa sang panibag-o nga kaso ilabi na kag madamo ang mga biktima nga nagapalapit sa ila talatapan.
Suno kay Ramos, dako ang posibilidad nga ipasarado liwat ang mga ginbuksan nga opisina sang KAPA mangin ang isa ka radio station sa siyudad sang Koronadal nga naga-promote sini ilabi pa nga klaro ang stoppage order nga ginpagwa sang korte batuk sa mga negosyo kag mga propiedad nga gina-angot sa KAPA nga dapat sundon.
Sa karon ginaproseso na nila ang mga dugang nga kaso kag ginamonitor sa gihapon ang KAPA kun sa diin sa magasunod nga mga inadlaw posible makapagwa na sang warrant of arrest.
Kun madumduman una na nga ginpahayag ni Atty. Francis Carlos, private lawyer sa South Cotabato nga base sa stoppage order sang korte sa KAPA, ang mga frontliners sini nga padayon sa pagpangganyat sa mga investors ang posible man magpangatubang sa mga kaso.
