KORONADAL CITY – May suspek na nga natumod ang kapulisan sa nagluntad nga pagpangluthang sa puluy-an sang pamilya Simpal sa Sitio Cogonal, Brgy. Topland, Koronadal City nga nagresulta sa kamatayon sang 2 kag pagkapilas naman sang 2 ka iban pa.
Ini ang ginkumpirmar ni Police Lt. Col. Rey Egos sa interbyu sang Bombo Radyo Koronadal.
Suno kay Egos, natalana naman nga igafile ang kaso sa nasambit nga suspek kag mga kaupdanan sini.
Nahibaluan nga may mga nakakita mismo sang natabo nga krimen.
Una diri, ginpahayag ni Shiela Mae Fernandez, asawa ni Jeffrey Fernandez, isa sa mga napatay, nga nagalantaw lamang sang telebisyon ang bana sini kag amay ngasi Lucio Simpal kagab-i sang ginsulod sila sang mga suspek kag ginpangluthang.
wala man makaluwas sa pagpangluthang ang pakaisa sini nga si Jeffrey Talino sang nagresponder sa nasambit nga pagpangluthang nga nagapaayo na subong sa hospital.
Pilason man ang 8 anyos nga bata nga si Iceen Pasamante sa amo nga insidente.
Sa karon blangko sa gihapon ang kapulisan sa kung ano ang motibo sang krimen.
