KORONADAL CITY – Ginpahugtan pa sang kapulisan ang seguridad sa regional center sa siyudad sang Koronadal matapos nga magpatigayon sang hublag protesta ang ginatos ka mga lumad sa atubangan sang talatapan sang DepED-12.
Ginasinggitran sang mga nagprotesta ang paghatag sang permit sa mga IP schools sa nagkalain-lain nga lugar sa rehiyon.
Madumduman nga nangin dako nga isyu sa South Cotabato kag kaiping nga probinsiya sa Sultan Kudarat kag Maguindanao ang suno pa pag-angkon sang rebel schools nga kalakip sang mga ginpasira sang militar bangud sa wala sang nagakaigo nga permit.
Apang, nagapanindugan ang DepED-12 nga kinahanglan mag-agi sa nagakaigo nga proseso ang nasambit nga mga buluthuan antes nga hatagan sang permit to operate.
Kadungan sini, nagpanawagan naman ang ACT Teachers Partylist nga pasakaan ang sweldo sang mga manunudlo sa pungsod.
Suno kay ACT Teacher’s Partylist Representative France Castro bangud sa dako nga epekto sang TRAIN law sa mga nagapanguna nga balaklon, panahon naman agud nga ihatag sang gobyerno ang ila nga hingyo.
Political will suno pa sang Duterte administration ang kinahanglan agud nga matuman ini.
