Nagpabutyag sang iya pagsuporta si Barangay Zone III Kapitan Victor Enrique Malinao sa pagpadayon sang Barangay and Sangguniang Kabataan Elections ukon BSKE 2026.
Sa interview sang Bombo Radyo Koronadal kay Malinao, iya ginpahayag nga pabor siya sa pagpatigayon sang eleksyon agud mahatagan sang kahigayunan ang mga pumuluyo nga makapili sang bag-o kag lider nga ila pagsaligan sa pagdumala sang komunidad.
Ginpahayag man ni Malinao nga indi siya nabalaka kon magpatigayon sang piniliay bangud kumpiyansa siya sa iya mga nahimo kag serbisyo para sa katawhan.
Bangud sini, nagpanawagan si Malinao sa mga botante nga magpili sang husto kag maayo nga lider nga magahatag sang prayoridad sa kaayuhan sang komunidad kag indi lamang sa personal nga interes.
Suno sa iya, dako nga responsibilidad ang mangin punong barangay kun sa diin nagakinahanglan sang maayo kag husto nga pagserbisyo sa katawhan.
