KORONADAL CITY- Ginkondenar sang Koronadal City Local Government Office ang padayon nga operasyon sang KAPA ukon Kabus Padatuon sa siyudad sang Koronadal.
Sa eksklusibo nga interbyu sang Bombo Radyo Koronadal kay CLGOO Juanito Agullana, nabaton nila ang advisory gikan sa Securities and Exchange Commission (SEC) kag memorandum circular gikan sa DILG national office nga nagapahayag nga isa ka investment scam ang KAPA nga gindihon ni Joel Apolinario.
Ginkumparar pa ni Agullana sa dalagko nga pyramiding scam sa pungsod ang KAPA apang aminado ini nga mabudlay punggan ang mga nagapain sang investment bangud sa promisa nga 30% nga interes kada bulan.
Wala suno pa sang may mahimo ang City DILG Office kundi ang maghatag sang warning sa posible nga pagbaha sang luha sa tion nga madamo pa sang maawhag ang KAPA nga mag-invest sa ila.
Samtang, ginpadal-an na sang 2nd notice of violation ang talatapan sang KAPA sa siyudad sang Koronadal kun diin ginhatagan sila sang 10 ka adlaw agud nga magsumiter sang mga requirement sa licensing office.
Madumduman nga pursigido man si Koronadal City Mayor Peter Miguel nga pauntaton na ang operasyon sang KAPA sa siyudad sang Koronadal.
