Nanindugan ang kampo ni Senador Ronald ‘Bato’ dela Rosa nga wala pa natapos ang ila nga pagpakigbato.
Ini ang nangin pahayag sang kampo ni dela Rosa matapos ginbasura sang Supreme Court (SC) ang ila hingyo nga Temporary Restraining Order (TRO) agud indi pag-iserbe ang arrest warrant nagikan sa International Criminal Court (ICC) batok sa Senador.
Sa ginpaggwa nga statement sang Torreon Law firm, nakasaad nga ginarespeto nila ang desisyon sang Korte Suprema apang ginsiling nga ang ruling ang nagatumod lang sa provisional relief kag indi pa angot sa constitutional issues sang kaso.
Ginhatagan pagtamod sang kampo nga indi pa ini ang pinal nga desisyon kon bala mahimo arestuhon, isungka, ukon isaylo sa foreign tribunal ang isa ka Pilipino nga wala nakaagi sa judicial process sa idalom sang layi sang Pilipinas.
Bangud sini, maga-file sila sang Motion for Reconsideration kag nagpasalig nga gamiton nila ang tanan nga legal remedies agud maproteheran ang ila kliyente.
