KORONADAL CITY – Dako nga kawad-an suno pa sa bahin sang Bangsamoro Islamic Freedom Fighters (BIFF) ang kamatayon sang ila nga tagpamaba.
Ini ang ginpahayag ni 6th Infantry Division Philippine Army Spokesman Major Arvin Encinas sa interbyu sang Bombo Radyo Koronadal.
Suno kay Encinas, napatay si Bandong Mamalumpong alyas Kumander Abu Amir sang BIFF Karialan Faction sa Sitio Macantal, Brgy. Olandang, Midsayap North Cotabato sa ginpatigayon nga operasyon sang gintingob nga pwersa sang PNP kag AFP.
Maluwas kay Kumander Abu Amir, patay man sa operasyon ang kaupdanan sini nga ginkilala kay Nur Hamid Sabdullah.
Narekober naman ang M-14 kag M-16 rifles, magazine kag mga bala sa ginakutaan nga lugar sang mga terorista.
Ginkasubo naman ni Encinas ang pagkapilas sang isa ka suldado apang yara na sa maayo nga kahimtangan.
Sa karon, nagapadayon ang operasyon sang militar kag kapulisan batuk sa mga katapo sang BIFF.
Ginpasiguro man sang opisyal nga mahuyang na ang grupo sang BIFF kag indi nila pagtugutan nga makapatigayon sang kalakasan ilabi na sa nagahilapit na eleksyon.
