Target sang Kamara nga malakip ang hagna nga Anti-Political Dynasty Law bilang isa sa nagapanguna kag pinakadako nga kadalag-an sa palaabuton nga State of the Nation Address (SONA) ni Presidente Ferdinand Marcos Jr. sa bulan sang Hulyo.
Ginapaabot nga isa ini sa mga sentro nga isyu nga iya pagatalakayon bilang kabahin sang administrasyon nga reporma sa sistema sang pulitika sa pungsod.
Suno kay Zia Alonto Adiong, Lanao del Sur 1st District Representative kag chairman sang House Committee on Suffrage and Electoral Reforms, “number one priority” ang nasambit nga hagna sa listahan sang Legislative-Executive Development Advisory Council (LEDAC).
Ginpahayag man niya nga ginapadali na sang komite ang deliberasyon agud mapasar ini antes ang Lenten break sang Kongreso, bilang pagpakita sang seryoso nga pagtamod sa reporma sa eleksyon.
Apisar may yara na sang probisyon batok sa political dynasties sa 1987 Constitution, wala pa gihapon sang napasar nga enabling law ang Kongreso sa nagligad nga halos apat ka dekada.
