Magabalik-sesyon subong nga adlaw ang House of Representatives kag magatutok sa pag-aprobar sang 36 halin sa 48 nga prayoridad nga mga hagna nga layi sang Presidente Marcos halin sa listahan sang Legislative-Executive Development Advisory Council (LEDAC).
Suno kay House Majority Leader Sandro Marcos, pagatinguhaon sang Kamara ang mas dasig kag mas disiplinado nga pagtalakay sang mga hagna agud mapadayon ang momentum kag matutukan ang mga reporma nga diretso nga nabatyagan sang publiko, kasubong sang pagkaon, ikaayong lawas, edukasyon, kag serbisyong panlipunan.
Dugang pa niya, indi sila nagapromisa sang milagro kundi sang hugot nga mga deadline kag mas maayo nga koordinasyon agud mahatag ang mga ginapaabot nga reporma sa husto nga oras.
Sa ulahi nga datos, sa sulod sang 22 ka session days sang 20th Congress, 12 ka LEDAC measures ang naipasa, samtang 7,127 ka hagna kag 660 ka resolusyon ang na-file tubtob Enero 15.
Sa sini nga mga hagna, 86 ang na-aprobaran kag 584 ang naproseso sang mga komite kag plenaryo sang Kamara, nga nagapakita sang kasiglahon sang lehislatibo nga trabaho sa umpisa sang bag-o nga Kongreso.
Ginapasalig ni Sandro Marcos nga padayon nga mas tutukan ang mga reporma nga makahatag sang madinalag-on nga serbisyo publiko kag tangible nga epekto sa kabuhi sang mga pumuluyo.
