Ginarekomendar sang House of Representatives ang pagpasaka sang kaso batok kay Bise Presidente Sara Duterte kag iban pa bangud sang ginatawag nga technical malversation, perjury, bribery, kag plunder.
Ang kaso may kaangtanan sa indi husto nga paggamit sang confidential funds sang Office of the Vice President kag sang Department of Education.
Sa ginpatigayon nga plenary session sang Martes, gin-aprobahan sang manubo nga panalgan ang committee report sang House Committee on Good Government and Public Accountability nga amo ang nagpatigayon sang hearing sa kaso.
Base sa committee report, napatod-an sa mga hearing nga may gin-gamit nga mga pondo sang gobyerno nga nagalab-ut sa P50 milyon kag ang confidential funds nga naglab-ut sa P612.5 milyon wala nagamit sang husto.
Dugang pa ni Committee Chairperson Rep. Joel Chua, si Duterte ang una nga Bise Presidente nga nangayo sang sobra-sobra nga confidential fund, kun sa diin masobra P125 milyon ang nagasto sa sulod lang sang 11 ka adlaw.
Madumduman nga una na ginpanigwala ni Bise Presidente Duterte ang mga alegasyon batok sa iya.
