KORONADAL CITY – Nagapanawagan ang mga otoridad kag nagkalain-lain nga mga sektor nga kuntani untatan na sang New People’s Army ang ila ilegal nga ginahimo kag pagpatigayon sang kalakasan sa mga pumuluyo.
Kabahin lamang ini sa ila apela sa ginpatigayon nga indignation rally sa banwa sang Sto. Nino, South Cotabato.
Sa interbyu sang Bombo Radyo Koronadal kay Lt. Diogenes Hare, deputy chief of police sang Norala PNP, ang nasambit nga aktibidad ang gintambongan sang mga opisyal sang barangay, BPATS, kag iban pa nga mga sektor.
Diri ila man nga ginapangamuyo ang pagpangibabaw sang kalinong sa bug-os nga rehiyon 12, kag kuntani magbalik na sa sabak sang gobyerno ang mga rebelde nga grupo bangud nagahulat ang mga maayo nga programa sang gobyerno para sa ila.
Nahibaloan nga ang nasambit nga rally inisyatibo sang PNP kag DILG kun sa diin nagdugay ini sang masobra isa ka oras.
