Nasungkit ni Emmanuel “Jimuel” Pacquiao Jr. ang kanyang unang panalo sa professional boxing matapos magtala ng isang impressive na knockout laban kay Darrick Gates sa ikalawang round ng kanilang 4-round lightweight fight nitong Sabado (Manila time) sa Pechanga Resort and Casino sa California, USA.
Matapos ang isang mahigpit na unang round, ipinakita ni Jimuel ang kanyang lakas sa ikalawang round. Sunod-sunod niyang nakakonekta ang mga malalakas na suntok, at tinapos ito ng isang hook na nagpatumba kay Gates. Kahit na nakabangon pa si Gates bago matapos ang 10-count ng referee, hindi pa rin nakaligtas sa isa pang malupit na body shot mula kay Pacquiao, na nagpatuloy sa pagbagsak ng kalaban.
Dahil dito, itinigil na ng referee ang laban matapos ang isang minuto at 34 segundo ng ikalawang round, at idineklara si Jimuel Pacquiao bilang panalo via Technical Knockout (TKO). Ang panalo ni Jimuel ay nagbigay sa kanya ng rekord na 1 win, 0 loss, at 1 draw sa kanyang professional boxing career.
Ang debut na ito ni Jimuel ay isang magandang simula para sa kanyang boxing career at tiyak na magbibigay inspirasyon sa mga tagahanga ng Pacquiao family.
