Nagdangat na sa 3.3-million metric tons ang rice imports sang Pilipinas halin sang Enero tubtub sang Septyembre subong nga tuig.
Base ini sa data sang Bureau of Plant Industry (BPI) nga nagapakita man nga ang na-import nga bugas sa amo nga period ang mas mataas sang 22 percent ipaanggid sa 2.68 MMT nga volume sa amo man nga tion sang nagligad nga tuig.
Base pa sa bureau, ang 2.6-MMT diri ang nagikan sa Vietnam samtang ang 410,000 MT naman ang naghalin sa Thailand.
Nahibaluan nga hugot ang monitoring sang industry players sa pag-abot sang imported nga bugas sa Pilipinas halin sang ginbuhinan sang gobyerno ang taripa sa 15 percent sang Hulyo.
Una naman nga gin-abi-abi sang mga eksperto kag industry players ang pag-lift sang restriction sang India sa gina-export nila nga bugas. Ini nga tikang ang ginalantaw nga magapa-estable pa sang rice market supply sa kalibutan nga magapahagan-hagan sa presyo.
